Lebollo
Koma ya Basotho ba lebowa e ikgethile ge go bapetšwa le ya ditšhaba tše dingwe. Koma ya bašemane e tšwa pele gomme ge e aloga gwa tsena ya basetsana. Ge koma e aloga, dialoga di a opela gomme tša amogelwa ke setšhaba ka legowa le legolo. Ke masogana bjale ka ge ba tshedišitšwe bošoborong. Koma e na le mohola o mogolo kudu setšhabeng ka ge bašemane le basetsana ba ithuta melao ya bonna le ya bosadi. Ge badika (na) ba aloga, ba tlotšwa ka matsoku ba apešwa dipheta le lekgeswa .
Bagwera
Dialoga di tsenela mošate moo di tšewago ke batswadi go ya magaeng a bona ka gare ga legoa la direto le mekgolokwane. Koma ya bobedi ya bašemane e bitšwa bogwera. Gona moo ba loga hlokwa, ba rutwa melao ye e feleletšego ya bonna. Lešoboro ga le eme tseleng ya magwera ka ge le tla otlwa ka thupa o šoro ke ona magwera ao. Ka ge re tšhaba go nyenyefatša segagešo, re ka se hlaloše tšeo di diregago ka komeng ka ge e le dikhupamarama.
Koma ya basetsana ke ye tee fela. Ge basetsana ba bolla, ba bitšwa bale gomme o tee ke ngwale. Koma ya basetsana, ga e tšwe ka nako e tee le ya bodika. E tšwa ka nako e tee le ya bogwera. Kua komeng, basetsana ba ithuta diila, bosadi le hlompho. Ge mosetsana a aloga, o tsena bokgarebeng. Kgarebe ke mosetsana yo a ithutilego melao ya bosadi gomme a loketšwe ke go ka nyalwa gore a swane le basadi ka moka.
Thuto ya bosadi komeng, e rutwa ke bakgekolo. Dikoma tša basetsana di fapana go ya ka meboto. Mohlala, Balobedu bona ba na le koma tše pedi tša basetsana. Koma ya mathomo ke ya bana bao ba sa hlwago ba hlaologanya bophelo ka botlalo. Koma ya gona e tšea matšatši a se ma kae fela. Ge bona basetsana bao ba e tšwa ditlolamelora, ba išwa komeng ya bojale.
Bale
Ge ba feditše ka yona thuto ye ya lebollo, dialoga ge di bowa gae e ba maloko a a feleletšego setšhabeng. Go dirwa meyanya ye megolo gomme gwa dirwa bjala bja setšo le dijo, gwa binwa gomme go thabilwe. Lešoboro (monna yo a sa bollago) le lethumaša (lekgarebe le le sa bollago), ba ka se o age motse wa tia. Lešoboro ga le eme kgorong pele ga banna ge go rerwa ditaba tša motse. Le mosadi wa lethumaša a ka se eme pele ga basadi ge go rerišanwa ka ditaba tša sesadi.
Monna wa lešoboro ge a dirile molato, ga a ahlolwe ka ge setšo se sa dumelele gore motho o bjalo a ahlowe. Go ra gore lešoboro le tshwana le selo sa go hloka mohola setšhabeng. Le bokgonyaneng, lešoboro le ka se ye. Ge e le mosadi wa lethumaša yena, ga a thule megodu le basadi ba bangwe. O swanetše a ye komeng pele a ka dira mediro ya basadi. Mašoboro goba mathumaša ga a be le direto ka ge sereto se fiwa bao ba bowago komeng.
Mathomong
